ХӨЛБӨМБӨГ: МОНГОЛЫН БАГ ХҮРЭЛ МЕДАЛИЙН ТӨЛӨӨ ТОГЛОНО
“Улаанбаатар 2023” Зүүн Азийн залуучуудын наадмын хөлбөмбөгийн тэмцээн өнөөдөр өндөрлөнө. Өчигдөр эмэгтэй багууд аваргаа тодруулж, БНСУ-ын охид тэргүүлсэн. Өнөөдөр МХБХ-ны ногоон талбайд эрэгтэй багуудын шийдвэрлэх тоглолтууд болно. Одоогийн байдлаар Тайвань, Хонконгийн баг ижилхэн 6 оноотой байна. Гэхдээ Тайванийн баг гоолын зөрүүгээр дээр нь бичигдэж байна.
Өнөөдөр 12:30 цагаас энэ хоёр баг хоорондоо халз тулж, хэн нь Зүүн Азийн аварга болохоо шийднэ. Харин 17:00 цагаас манай шигшээ баг Макаотой тоглоно. Оноо аваагүй байгаа хоёр багийн хэн ялсан нь хүрэл медальтай. Гоолын зөрүүгээр манайх илүү байгаа тул тэнцэхэд л болох учиртай. Гэхдээ нутгийнхаа талбай дээр сүүлийн тулаанаа ялалтаар өндөрлүүлэхийн төлөө тоглох нь мэдээж. Хөлбөмбөгийн тэмцээнийг ТВ6, MNB телевиз шууд дамжуулан үзүүлж байна.Спорт сонирхогчид та бүхэн МХБХ-ны ногоон талбайд ирж, шигшээ багаа дэмжээрэй.
Эх сурвалж: Champ media
